निसर्ग संपन्न पालघर पर्यटन

भौगोलिक दृष्टया जंगलव्याप्त खडकाळ व दऱ्याखोऱ्यांचा बराचसा भाग असणारा आणि “सुगंधी बासमती तांदुळ” म्हणून ओळख असलेल्या वाडा कोलम या ” जी आय टॅग मिळालेल्या ” तांदळासाठी जगप्रसिद्ध असणारा वाडा तालूका हा पालघर जिल्हयाच्या पुर्वेस असून पालघर जिल्ह्यातील अतिदुर्गम भाग म्हणून ओळखला जातो . सरासरी 100 ते 125 इंच इतके पर्जन्यमान असणार्‍या वाडा तालुक्यामध्ये तिळसा येथे प्रसिद्ध असलेले पांडवकालीन तिळसेश्वर शिव मंदिर हे शंकराचे मंदिर आहे . जवळच विठठल रखुमाईचे प्रसिद्ध मंदिर आहे. तसेच मंदिरे तसेच कुंडे असणारा तालुक्यातील कोहोज किल्ला प्रसिदध आहे. गालतरे येथे हरे राम हरे कृष्ण अंतर्गत श्री .कृष्ण लीला साकारली गेली आहे तसेच श्री. कृष्णाचे अवतार , मथुरा नगरी , गोवर्धन पर्वत तयार केलेला असुन पर्यटकांची ते पाहण्यासाठी खुप गर्दी असते.
कोहोज किल्ला, तिळसेश्वर मंदीर, परशुराम मंदिर – गुंज, हातोबा देवस्थान यांचा प्रेक्षणीय स्थळांमध्ये उल्लेख करता येतो.

वाडा तालुक्यातील गुंजकाटी या ठिकाणी पांडवकालीन बाल्यावस्थेत असलेली परशुरामाची मूर्ती मंदिर एका मोठ्या पाषाणाने बनविलेले आहे. हे मंदिर गुंज गावच्या एका डोंगरावर दृष्टीत पडते. तसेच याच गावी पांडवकालीन शिल्प, शिवलिंग आणि भागिरथीचे मंदिर भग्नावस्थेत तेथील विस्तीर्ण तलावाच्या काठी पाहावयास मिळते. त्याचप्रमाणे याच गाव परिसरात काटी या गावी निसर्गरम्य वातावरणात वज्रेश्वरी मंदिराचे मूळस्थान म्हणून काटी यागावी त्यांचे मंदिर आहे. पोर्तुगीजांच्या ताब्यातील वसई किल्ला सर करण्यासाठी पेशवे चिमाजी आप्पांनी वज्राई देवीला नवस केला होता. किल्ला सर झाला आणि नवस फेडण्यासाठी वज्रेश्वरी तालुका भिवंडी येथे किल्ल्याच्या स्वरूपाचे मंदिर बांधले. मात्र या देवीचे मूळस्थान वाडा तालुक्यातील गुंज-काटी परिसरात आहे. या ठिकाणी कालिका-रेणुका आणि वज्राई देवीच्या तीन मूर्ती एकाच ठिकाणी पाहायला मिळतात. या देवींच्या मूर्ती वज्रेश्र्वरी तालुका भिवंडी इथल्या मंदिरातही पाहायला मिळतात.

नाथपंथीय भक्तांचे श्रद्धास्थान म्हणून वाडा तालुक्यातील अंबिस्ते नागनाथ देवस्थान वैतरणा नदीच्या कडेला विस्तीर्ण जंगलव्याप्त परिसरात आहे. आजही नागनाथ देवस्थान नाथपंथीय धुनी कायम प्रज्वलित ठेवली जाते.

वाडा तालुका जातो. वाडा तालुका ‘वाडा कोलम’ मुळे जगभर प्रसिद्ध आहेच. त्याचबरोबर निसर्गदेखील या भागावर मेहरबान झाला आहे. तालुक्यात अनेक पावसाळी पर्यटनस्थळे आहेत. त्याचबरोबर अनेक धार्मिक पर्यटनस्थळेही आहेत. या पर्यटनस्थळांनी तसेच निसर्ग संपदेने वाड्याच्या सौदर्यांत भर टाकली आहे; मात्र यातील अनेक पर्यटनस्थळे काहींना माहित देखील नाहीत. त्यातील एक अद्भुत आणि रहस्यमय ठिकाण म्हणजे तिळसा होय. तालुक्यातील प्राचीन तिळसेश्वर महादेवाचे मंदिर वाडा गावापासून ८ कि. मी. अंतरावर निसर्ग रम्य अशा ”तिळसा” गावी आहे. तिळसा येथील शिवमंदिर हे पांडवांनी एका रात्रीत बांधले आहे अशी आख्यायिका असुन या मंदिराचे आणखी एक वैशिष्ट म्हणजे मंदिर नदीच्या मध्यभागी एका मोठ्या अखंड खडकावर उभारलेले आहे. येथील मुख्य आकर्षण म्हणजे येथील देव मासे होय. या प्रकारचे मासे दुस-या कोणत्याही भागात आढळत नाहीत असेही म्हटले जाते. या देव माशाबद्दल एक लोककथा प्रसिद्ध आहे. वाड्यात लोकांचा पुर्वीपासून मासेमारी हाच मुख्य व्यवसाय होता. एका कोळी जोडप्याने या नदीच्या पात्रातील मासे पकडून घरी नेले. तो मासा कापण्यात आला तेव्हा तो मासा आपोआप परत जोडला जाऊन जिवंत झाला. हा सगळा प्रकार पाहून ते जोडपे चकीत झाले. त्यांनी त्या माशाची पूजा केली व पुन्हा नदीत सोडून दिले.अशी येथील भाविकांची श्रद्धा असल्याने येथे मासे पकडण्यास सक्त मनाई आहे.